Мемлекет басшысы Қасым-Жомарт Тоқаев 2025 жылды «Жұмысшы мамандықтары жылы» деп жариялады. Осыған орай Қазақстан Халық партиясы «Еңбек адамына» алғысын білдіру мақсатында арнайы акция бастады. Партияның аймақтық филиалдары ерекше көзге түскен еңбек ұжымдарына арнайы Құттықтау хат табыстауды көздеп отыр.
ҚХП Қызылорда облыстық филиалы осындай марапатты «Қызылорда тазалығы» ЖШС қызметкерлеріне табыс етті. Бұл ұжымның қызметкерлері аптап ыстықта, қақаған аязда, қолайсыз ауа райында қала тазалығын сақтау жолында адал еңбек етіп келеді. Кездесу барысында ҚХП өкілдері ұжымды партия атынан құттықтап, лайықты жұмысы үшін алғыс білдірді.
– Жұмысшы мамандықтары жылы» – жұмысшы мамандықтардың мәртебесін көтеруге, жастарды осы салаға тартуға және еңбек нарығында сұранысқа ие білікті кадрларды даярлауға бағытталған. Біздің бастамамыз осы идеяны насихаттау мақсатында ұйымдастырылып отыр, – деп атап өтті партиялықтар.
Осындай марапаттау шарасын ҚХП Қарағанды облыстық филиалы да өткізді. Партия мүшелері Қарағанды жоғары медициналық колледжінің оқытушылары мен студенттеріне медицина қызметкерлерінің еңбегінің маңызы зор екенін айтып, ұжымды құттықтады. Ресми шараға филиал төрағасы Қалел Мақсұтов, сондай-ақ облыстық мәслихат пен партияның жергілікті әйелдер қанатының өкілдері қатысты.
Партиялықтардың Түркістан облысындағы әріптестері «Оңтүстік Жарық Транзит» ЖШС қызметкерлеріне Құттықтау хат табыстады.
– Жұмысшы мамандықтардың мәртебесін көтеру – еңбек жағдайын және еңбек келісім-шарттарын жақсарту, еңбек ұжымдарына қолдау көрсету. Бұл біздің қоғамға жүктелген міндет. Ол біздің елдегі жұмысшы мамандықтардың имиджін және Еңбек адамының рөлін арттыруға мүмкіндік береді, – деді партия өкілдері.
@halyk_partiyasy
.jpg)
