ҚР Парламенті Мәжілісінде бал ара шаруашылығы мәселелері талқылануда. Мұнда Қазақстан Халық партиясының депутаты, Аграрлық комитеттің өкілі Ислам Сұңқардың басшылығымен мамандандырылған алқалы жиын өтті.
Ислам Сұңқар атап өткендей, соңғы жылдары ара шаруашылығы саласында көптеген проблемалар жинақталып қалған.
- Бүгінде біздің міндетіміз бал ара өсірушілерге алаң ұсыну, оларға өз ұстанымдары мен пікірлерін білдіруге мүмкіндік беру және бірлесіп, орын алып отырған мәселелерді шешудің әдістері мен жолдарын табу, - деп атап өтті ол.
Ауыл шаруашылығы вице-министрі Бағлан Бекбауовтың айтуынша, «Ара шаруашылығы туралы» отандық заң 2002 жылы қабылданған. Өткен 20 жыл ішінде сала табысты дамыды, бірақ, өкінішке қарай, мемлекеттен ешқандай көмек болған жоқ. Республикалық бал ара шаруашылығы палатасының төрағасы Айбек Нұртазин Қазақстанда бал ара шаруашылығын дамытуды қолдаудың кешенді бағдарламасының жоқтығына шағымданды.
- Осыған байланысты нормативтік-құқықтық актілерді және бағдарламаның өзін әзірлеу бойынша саланың құзыретті тұлғаларынан жұмыс тобын құруды және оны мемлекеттік деңгейде бекітуді ұсынамыз, - деп атап өтті Нұртазин. Барлық бал ара шаруашылықтарының үлкен түйткілі - өсімдіктерді пестицидтермен және гербицидтермен өңдеу, әрі аграрийлер бұл туралы бал ара өсірушілерді үнемі ескертпейді.
- Бал араларының уланудан өлуі бал ара өсірушінің көпжылдық еңбегін жоққа шығарады, сондай-ақ өнім сапасына кері әсерін тигізеді, - деп мәлімдеді палата басшысы. - Аса қауіпті заттарды қолдануды шектеу, егістік алқаптарын өңдеуден кемінде үш күн бұрын хабарлау туралы міндеттерді аграрийлер мен жергілікті атқарушы билікке жүктеу керек және оның жоқтығы үшін әкімшілік жауапкершілік енгізу қажет.
Қазақстандық бал сапасы жақсы және импорттық өніммен бәсекеге қабілетті. Алайда, мұны дәлелдеу өте қиын, елімізде оны растайтын мамандандырылған зертханалар жоқ.
- Ең болмағанда қорытындыларын басқа елдерден өнім жеткізушілер де мойындайтын халықаралық стандарттар бойынша жасалған бір зертхананы құрып, жасақтап және тиісті инстанцияларда сертификаттау қажет, - деп ұсынды бал ара өсірушілер. - Олар жеткілікті болуы және шетелдік зертханалар тарапынан қайта тексеруді талап етпеуі үшін осылай жасау керек.
Кәсіпкерлер бал нарығындағы арзан бұрмалаушылардың үстемдігін, ауыл шаруашылығы жоғары оқу орындарында ара шаруашылығы мамандықтарының жоқтығынан кадрлар тапшылығын және, әрине, саланың дамуына мүмкіндік бермейтін ескірген заңнаманы атап өтті. Жиын қорытындысы бойынша құзыретті ведомстволарға жолданатын ұсыныстар дайындалды.
@halyk_partiyasy
.jpeg)
