Қазақстан Халық партиясы мүгедектігі бар адамдарды тәрбиелеп және қамқорлығына алып отырған отбасыларды әлеуметтік қорғау мәселесін қайта көтерді. Мәжілістің пленарлық отырысында ҚХП парламенттік фракциясының жетекшісі, депутат Магеррам Магеррамов тақырыпты жан-жақты талдады.
Мәжілісмен мұндай отбасылар қаржылық, физикалық және психологиялық қиыншылықпен бетпе-бет келетінін атап өтті. Бұған қоса әлеуметтік қызмет алу үшін адамдар күрделі бюрократиялық тосқауылға тап болып, сергелдеңге салынатынын жеткізді.
– Жылына бір рет оңалтудан өту орындалмайтын арманға айналды. Мүгедектігі бар балаларды оңалтқысы келетін отбасылар мүмкіндікті жылдар бойы күтеді, – деді депутат.
Техникалық оңалту құралдары жылдар бойы күрделі мәселе туғызып келеді.
– Еңбек және халықты әлеуметтік қорғау министрлігі мемлекеттік ақшаны желге ұшыруды жалғастырып жатыр, – деді М. Магеррамов. – Техникалық оңалту құралдарына ақша сапа емес, сан принципі бойынша жұмсалады.
Балабақшаларда мүгедек балаларға арналған топтарда орын жетіспейді.
– Көбінесе ауыр дерті бар балалар жағдайына сай келмейтін топқа орналастырылады. Ата-аналар көзге көрініп тұрған жағдайды дәлелдеуге мәжбүр болады. Қамқоршылық құжатын рәсімдеу бірнеше айға дейін созылады. Осы уақыт аралығында олар жәрдемақы алмайды, – деді М. Магеррамов.
Екінші топтағы мүгедектігі бар адам кәмелетке толғаннан кейін мүгедектігі жойылып, күтімді қажет етпейтін адамдардың санатына қосылатын сияқты болуына байланысты үкімет ата-аналарына немесе қамқоршыларына күтім бойынша жәрдемақы төлеуді тоқтатады.
– Қолданыстағы осы тәжірибені қайта қарау қажет деп санаймыз, – деді депутат.
Фракция мүшелері қамқорлығында баласы немесе мүгедектігі бар отбасының кәмелетке толған мүшесі бар ата-ананың зейнетке шығу жасын төмендету қажет деп санайды.
– Мәселенің маңыздылығын мойындай отырып, мүгедектігі бар адамдарға және мүгедектігі бар туыстарының қамқорлығындағы отбасыларға қатысты мемлекеттік саясаттың тәсілін түбегейлі өзгертуді ұсынамыз, – деді М. Магеррамов.
@halyk_partiyasy
