Қазақстан Орталық сайлау комиссиясы Мәжіліс пен мәслихаттар сайлауын қорытындылады. Оның деректеріне сәйкес, парламенттің төменгі палатасына 6 саяси ұйым өтті. Қатарында Қазақстан Халық партиясы да бар.
Партиялық тізімдер бойынша есептеулердің соңғы нәтижелерін Орталық сайлау комиссиясының төрағасы Нұрлан Әбдіров жариялады.
– Сайлау қорытындылары анықталып, Парламент Мәжілісінің депутаттары сайланды, – деді ол. – Баршаңызды осы маңызды, мемлекеттік және саяси оқиғамен құттықтаймын!
Сонымен ОСК мәліметтері бойынша, Amanat партиясына 3 431 510 адам дауыс берді (53,9%) және ол Мәжілістен 40 мандат алды. Ал «Ауыл» ХДПП 10,9 пайызбен (693 938 адам) Мәжілістен 8 орын, «Ақ жол» ХДП 8,41% (535 139 адам) – 6 орын иемденді. Қазақстан Халық партиясына 432 920 (6,8%) сайлаушы дауыс беріп, сәйкесінше, 5 парламенттік мандат алды. Тағы 6 мандатты 8,59 пайызбен (547 154) «Respublica» партиясы және 5,2 пайызбен 4 орынды (331 058 адам) ЖСДП алды. «Байтақ» экологиялық партиясы 5% кедергіні еңсере алмай Парламентке өтпеді.
– «Барлығына қарсы» бағанын 3,9% немесе 248 291 қазақстандық сайлаушы таңдады, – деп нақтылады Әбдіров.
Айта кетейік, жаңартылған сайлау заңнамасына сәйкес Парламент Мәжілісі мен мәслихаттар депутаттарын сайлау 2023 жылғы 19 наурызда өткен еді. Дүбірлі додаға барлық тіркелген саяси ұйымдар толық қатысқан еді.
@halyk_partiyasy
