Қазақстан Халық партиясының төрағасы Ермұхамет Ертісбаевтың жетекшілігімен алдағы Құрылтай сайлауына қатысты өңірлік филиалдармен кеңес өтті. ҚР жаңа Конституциясы жобасының қабылдануы, шын мәнінде, елдегі электоралдық науқанның басталуына түрткі болды. ҚХП филиалдарының басшылары сайлауалды үдеріске дайындық бойынша атқарылған жұмыс туралы есеп берді.
ҚХП Алматы қалалық филиалының жетекшісі Бейбіт Құсайынов өзіне қарасты өкілдіктің бақылаушыларды даярлау, кандидаттарды іріктеу, үгіт-насихат тобы мен сайлау штабтарын қалыптастыру бағытындағы жұмыстарды баяндады.
– Алматы қалалық филиалы электоралдық науқанға басқарылатын, жүйелі және ресурстық тұрғыдан қамтамасыз етілген дайындықты көрсетіп отыр, – деп түйіндеді Б. Құсайынов. – Келесі кезеңнің басты міндеті – ұйымдастырушылық дайындықты нақты электоралдық нәтижеге айналдыру.
ҚХП Шымкент қалалық филиалының басшысы Бақтияр Жандарбеков бақылаушыларды даярлау, партиялық тізім бойынша Құрылтайға ұсынылатын кандидаттарды іріктеу және үгітшілер корпусын жасақтау бағытында белсенді жұмыс жүргізіліп жатқанын жеткізді. Партияның Орталық штабы филиал кеңсесінің базасында құрылуда.
– Шымкент қалалық филиалы алдағы электоралдық науқандағы партияның алдында тұрған жауапкершілік пен міндетті толық түсінеді, – деді Б. Жандарбеков.
ҚХП Жамбыл облыстық филиалының төрағасы Рахман Аққозиев белсенділер тарапынан бақылаушылар пулы жасақталғанын, бірқатар үміткерлер әлі де қаралу сатысында екенін атап өтті. Партиялық тізімге ұсынылатын өз кандидаттары да бар. Үгітшілер тобы құрылып, оның құрамына журналистер мен жергілікті пікір көшбасшылары енгізілген. Сайлау штабтарының инфрақұрылымы және жаңа бастауыш партия ұйымдарын құру бағыттары айқындалған.
– Біздің басымдық – формалды қатысу емес, нақты нәтижеге қол жеткізу: мықты кандидаттар, тиімді жұмылдыру және сайлау үдерісін толық бақылау, – деп қорытындылады Р. Аққозиев.
ҚХП Түркістан облыстық филиалын басқаратын Зухра Қамбарова өзінің өңірі сайлау учаскелерінің саны бойынша ең ірі өңір екенін атап өтті. Олардың саны шамамен 1000-ға жуық және әрқайсысын бақылаушылармен қамтамасыз ету жоспарланған.
– Біздің филиал қойылған міндетті жоғары деңгейде орындауға және осы жолда жауапкершілікті өз мойнына алуға дайын, – деп атап өтті З. Қамбарова.
ҚХП Жетісу облыстық филиалының төрағасы Олжас Ибраимов алдағы сайлауға дайын екендерін айтты. Мұнда бақылаушылар резервін қалыптастыру, Құрылтайға кандидаттарды анықтау, сондай-ақ үгітшілер мен сенімді тұлғалар тобын жасақтау бойынша белсенді жұмыс жүргізілуде.
– Өз тарапымнан, облыстық филиал төрағасы ретінде қойылған міндеттердің толық орындалуын қамтамасыз етуге дайын екенімді растаймын және олардың орындалуына жеке жауапкершілік аламын, – деді О.Ибраимов.
ҚХП Қызылорда облыстық филиалы төрағасының орынбасары Берік Шайнұров өз өңіріндегі әрбір сайлау учаскесін кемінде екі бақылаушымен қамтамасыз етуді жоспарлап отыр. Құрылтайға филиал тарапынан бірқатар кандидат ұсынылған. Үгітшілерді іріктеу жұмыстары жүргізілуде.
– Қызылорда облыстық филиалы қойылған міндетті лайықты орындауға толық дайын, – деді Б.Шайнұров.
ҚХП төрағасы Ермұхамет Ертісбаев кеңесті қорытындылай келе, партия электоралдық науқанға қажетті шараларды тиісінше атқарып жатқанын атап өтті.
– Біздің сенім деңгейінің нақты көрсеткіші – есеп папкасы емес, өңірлердегі азаматтардың мәселелерін жүйелі түрде шешу, – деді партия басшысы. – Сайлаушы бізден дәл қазір өзгеріс жасай алатын, әрекетшіл партия көруі тиіс.
Е. Ертісбаев партияластарын электоралдық жұмысқа барынша прагматикалық тұрғыда қарап, оны ҚХП-ның болашағына салынған инвестиция ретінде қабылдауға шақырды.
– Сіздердің жұмыстарыңыздың бағасы ашылған штабтардың санына қарай емес, өңірдегі саяси ықпалдың сапасына қарай беріледі, – деп нақтылады партия төрағасы. – Яғни, Қазақстан Халық партиясына берілген дауыс санына қарай. Біз формализмге жол бере алмаймыз. Бізде бәрі бар: айқын идеология мен бағдарлама, жаңартылған құрылым және ең бастысы – халықтың әділдікке деген сұранысы.
@halyk_partiyasy
