Қазақстан Халық партиясының төрағасы Ермұхамет Ертісбаев ҚР Парламенті Мәжілісі мен өңірлік мәслихаттар депутаттарының кезектен тыс сайлауына қатысты. Партия басшысы елордадағы М. Өтемісов атындағы оқушылар сарайында орналасқан № 137 сайлау учаскесінде дауыс берді.
– Өткен Парламенттік сайлау кампаниясы Жаңа Қазақстан құруға жасалған алғашқы және нақты қадам болды – деді Е.Ертісбаев сайлау учаскесінде сөйлеген сөзінде.
Шындығында мұндай оң өзгеріс ел Президенті Қасым-Жомарт Тоқаевтың бастамаларының арқасында жүзеге асты. Қазақстан жаңа саяси реформаларға нық қадам басты.
– Президент өз сөзіне адал болды, – деді партия басшысы. – Халықаралық және ішкі жағдайға қарамастан, парламенттік сайлау өтті.
Қазіргі сайлау – бұрынғыдан өзгерек. Тәуелсіздік тарихында тұңғыш рет можаритарлық жүйеге 30% берілді. Бұл қоғамның сұранысы. Себебі отандастарымыздың басым көпшілігі партия құрамында жоқ. Оң өзгеріс нәтижесінде қоғамдық көшбасшылар да додаға түсіп, бақ сынады.
– Бұл ел тәуелсіздігінің 30 жылдан астам тарихындағы ең қызықты, мазмұнды және бәсекеге толы сайлау болды, – деді Е.Ертісбаев.
Халық партиясы төрағасының пікірінше, тарихтың объектісі болған азаматтар осы тарихтың субъектісіне айналды және солай болуы керек.
– Бұл¬ – халықтың жеңісі. Біз саяси сауатты мемлекетке айналдық, – деп қорытты ойын партия төрағасы. – Біз Әділетті және жаңа Қазақстан құрамыз. Бұл – Парламенттік сайлаудың басты нәтижесі.
Айта кетейік, ҚР Парламенті Мәжілісі мен өңірлік мәслихаттар депутаттарының кезектен тыс сайлауы 2023 жылдың 19 наурызында өтті. Оларға жеті партияның өкілдері, сондай-ақ бір мандатты округтер бойынша бақ сынаған үміткерлер қатысты.
@halyk_partiyasy
