Үкіметтің кеңейтілген отырысында сөйлеген сөзінде ҚР Президенті Қасым-Жомарт Тоқаев еліміздегі тағдыршешті оқиға – жаңа Конституция жобасын талқылау мәселесіне арнайы тоқталды.
Президент қазақстандықтар бұл мәселені жарты жылдан бері талқылап келе жатқанын еске салды. Барлық ұсыныстарды жүйелеу үшін Конституциялық комиссия құрылды.
– Елімізде құрамы мен ауқымы және кәсібилігі бойынша бұрын-соңды мұндай комиссия болған емес, – деп нақтылады Қасым-Жомарт Тоқаев. – Атап көрсетерлігі, бұл Комиссияның құрамында шетелдік сарапшылар жоқ.
Құжатпен жұмыс барысында барлық азаматтар eGov және eOtinish мемлекеттік цифрлық платформалары арқылы пікір білдіру құқығына ие болды. Платформаларға мыңдаған өтініш келіп түсті. Комиссия барлық ұсыныстарды жан-жақты қарап, жинақтап, бірқатар түзету енгізді.
– Комиссия жұмысы барынша ашық болды, – деп атап өтті Президент. – Еліміздегі осыған дейінгі реформалар дәл осылай жан-жақты талқыланып, тікелей эфир арқылы көрсетілген емес.
Қоғамдық пікірталас – талқылаудың маңызды құрамдас бөлігі. Мемлекет басшысының саяси бағытының негізгі міндеттерінің бірі – қоғамның белсенділігі мен саяси мәдениетін арттыру.
– Түптеп келгенде ұсынылып отырған түзетулердің мәні адам мен азаматтың құқығы мен бостандығын қорғау қажет деген ойға алып келеді, – деп түйіндеді Қасым-Жомарт Тоқаев. – Бұл жай ғана декларациялар жиынтығы емес! Біз адам құқығының қорғалуына кепілдік беретін және оның нақты жолдары айқын көрсетілетін біртұтас жүйе қалыптастырамыз.
Парламенттегі ҚХП фракциясының жетекшісі, Заңнама және сот-құқықтық реформа комитетінің хатшысы, Конституциялық реформа жөніндегі комиссияның мүшесі, депутат Магеррам Магеррамов жаңа Конституция жобасын қоғам болып талқылау қалыпты демократиялық үдеріс және тиімді шешім іздеу жолы деп санайды.
– Демократия ақиқатқа айналды, – деп түсіндірді М.Магеррамов. – Бұл ел азаматтарының, қоғамдық ұйымдар мен саяси партиялардың түрлі форматта саяси кеңес, конференция, дөңгелек үстел өткізіп, Конституциялық реформа сынды жалпыұлттық мәселені жан-жақты талқылауынан көрініс тауып отыр.
Қазақстан халқы жаңа Конституцияға қатысты тоқетер сөзін жалпыұлттық референдумда айтады.
@halyk_partiyasy
