Орталық сайлау комиссиясы жаңа Конституция жобасы бойынша өткен жалпыұлттық референдумның алдын ала қорытындыларын жариялады. ОСК мәліметінше, Қазақстанның жаңа Конституциясын сайлаушылардың 87,15%-ы қолдап дауыс берген. Сайлауға қатысу белсенділігі 73,12%-ды құрады. Жалпы дауыс беруге 9 127 192 қазақстандық қатысты.
Қазақстан Халық партиясы парламенттік фракциясының жетекшісі, Мәжілістің Заңнама және сот-құқықтық реформа комитетінің хатшысы Магеррам Магеррамовтың айтуынша, референдум тиісінше өтті.
– Бір жағынан, азаматтар мемлекет алдындағы жауапкершілігін, екінші жағынан, жоғары сайлау белсенділігі арқылы өз пікірін білдіріп, елінің болашағына ықпал етуге ұмтылатынын көрсетті, – деді мәжілісмен. – Референдум – азаматтардың мемлекет ісіне қатысуының маңызды түрі. Біз көріп отырған нәтиже, яғни азаматтардың маңызды шешім қабылдау үдерісіне қатысу елімізде демократияның қалыптасқанын көрсетеді.
Қазақстан Халық партиясынан сайланған Мәжіліс депутаты Ирина Смирнова дауыс беру аяқталғаннан кейін маңызды кезең – қазақстандықтардың бірлесіп қолдаған өзгерістерді іс жүзінде іске асыру кезеңі басталатынын атап өтті.
– Жаңа Конституция – тек шенеуніктерге арналған құжат емес. Ол бәрімізге ортақ ережелерді өзгертіп, маңызды кепілдіктер мен құндылықтарды бекітеді, – деп нақтылады И. Смирнова. – Бұл – жаңартылған саяси жүйе. Біз биліктің ықшамдалған үлгісіне көшеміз. Парламенттің екі палатасының орнына бір Құрылтай болады (145 депутат). Бұл – құқықтар мен құндылықтардың мызғымастығын білдіреді. Конституция Заң мен Тәртіп негізгі қағида болатын Әділетті қоғам құру бағытын бекітеді.
Депутаттың пікірінше, жалпыұлттық референдум халқымыздың жоғары азаматтық жауапкершілігін көрсетті.
– Адамдар референдумға отбасымен келіп, осы сәттің маңыздылығын терең түсінгенін көрсетті, – деді мәжілісмен. –Жастар да көп болды. Бұл жай ғана сан емес! Халықаралық бақылаушылар дауыс беру үдерісінің жоғары деңгейде ұйымдастырылғанын және оның ашық әрі әділ өткенін атап өтті.
Бүгін біз тағы бір мәрте Қазақстан – маңызды мәселелерді азаматтардың ашық диалогымен және қоғам мен мемлекеттің бірлігі арқылы шешетін ел екенін дәлелдедік.
Қазақстан Халық партиясынан сайланған Мәжіліс депутаты, ҚР Президенті жанындағы халықтың әлеуметтік осал топтарының құқықтары жөніндегі уәкіл Кенжеғұл Сейтжан да халық реформаны жоғары деңгейде қолдағанын атап өтті.
– Бұл сандардың артында бүгін сайлау учаскелеріне келіп, өз ұстанымын білдіріп, ел үшін маңызды шешім қабылдауға қатысқан миллиондаған адамдар тұр, – деп атап өтті ол. – Менің көзім көрмесе де, мұндай күннің ерекше атмосферасын сезбеу мүмкін емес: барлығын адамдардың даусынан, қозғалысынан, сайлаушылардың белсенділігінен аңғаруға болады. Мен қызу талқылауларды естідім, таныстарымды кездестірдім, адамдармен сөйлестім.
Мәжіліс депутаты әрі омбудсмен сайлау үдерісінің инклюзивтілігіне ерекше тоқталды.
– Бүгін мен үшін қоғамдық өмірге қатысудың қолжетімділігі туралы айту өте маңызды, – деді К. Сейтжан. – Мен үшін елімізде ерекше қажеттілігі бар адамдарға қолайлы орта қалыптастыруға айрықша көңіл бөлінетінін сезіну өте қуанышты жағдай. Сайлау учаскелерінде азаматтарға қажетті көмек көрсетілді, әркімге бағытты табуға көмектесетін тактильді белгілер орнатылды.
Есту қабілеті бұзылған азаматтар үшін сурдоаударма арқылы байланыс жасау мүмкіндігі қарастырылды. Ал қозғалысы шектеулі адамдар үшін арнайы көлік пен көшпелі топтар жұмыс істеді.
Депутаттың айтуынша, қолжетімді орта – жай ғана ыңғайлылық емес. Бұл – әр азаматтың пікір білдіруге және таңдау жасауға тең құқық алуының қамтамасыз етілуі.
– Зағип жандар үшін Брайль қаріпімен арнайы шаблондар қолданылды, олар дауыс берушіге бюллетеньді өз бетінше толтыруға және дауыс құпиясын сақтауға мүмкіндік берді, – деді ол. – Өз тарапымнан айтарым, шаблондардың сапасы жақсы және қолдануға ыңғайлы болды. Бұл әрбір адамға деген шынайы құрметтің көрінісі.
Қазақстан Халық партиясынан сайланған Мәжіліс депутаты, партияның «JAS ORTA» жастар қанатының жетекшісі Ислам Сұңқар жаңа Конституция жобасының қабылдануын халықтың тарихи шешімі деп атады. Ол бұл шешім еліміздің болашағына серпін беретінін атап өтті.
– Менің ойымша, бұл тәуелсіздігімізді нығайтуға, сапалы білім беруге, балаларымыздың жан-жақты дамуына, ұлттық құндылықтарымызды сақтауға, қоршаған ортаға қамқорлық көрсетуге, отбасы институтын қорғауға, азаматтардың құқықтарын қамтамасыз етуге, мемлекеттік басқару институттарының тиімділігін арттыруға және басқа да прогрессивті өзгерістерге жасалған маңызды қадам, – деп қорытты ол.
@halyk_partiyasy
