Қазақстан Халық партиясынан сайланған Мәжіліс депутаттары «Әділетті және Прогрессивті Қазақстанның Халықтық Конституциясы үшін!» жалпыұлттық коалициясы ұйымдастырып жатқан іс-шаралар аясында көшпелі ақпараттық-түсіндіру жұмысын жалғастыруда. Елорда мен өңірлерде өтіп жатқан іс-шаралар барысында мәжілісмендер сайлаушыларға жаңа Конституция жобасының новеллаларын түсіндіруде.
ҚХП фракциясының жетекшісі, Мәжілістің заңнама және сот-құқықтық реформа комитетінің хатшысы, депутат Магеррам Магеррамов үкіметтік емес ұйым өкілдерімен – «АСТ Астана әлеуметтік технологиялар» қоғамдық бірлестігі, «ЖасНұр» саңыраулар қауымдастығы және «Балам-ай» қоғамдық қоры ұжымымен кездесуге қатысты. Шара шеңберінде қатысушыларға ұсынылып отырған нормалардың азаматтардың тең мүмкіндігін қамтамасыз етуге, құқығын қорғауға және әлеуметтік ортаның қолжетімділігін арттыруға қалай ықпал ететіні туралы мағлұмат берілді.
Сонымен қатар М. Магеррамов «Smart Technological School» мектебіне бапарды. Мұнда ол білім беру жүйесін және инновациялар мен ғылымды дамытуға бағытталған нормалар туралы айтты.
– Диалог барысында біз жобаның негізгі ережелерін жан-жақты талқыладық, – деп нақтылады ҚХП фракциясының жетекшісі. – Мен білім беру саласына қатысты өзгерістер туралы сөз сөйледім.
Астана қаласы әкімдігінің шақыруымен Магеррам Магеррамов «Халықтық Конституция – Қазақстанның әділетті және прогрессивті болашағына жол» атты сараптамалық кездесуге қатысты.
– Бүгінгі іс-шараның қорытындысы бойынша айтарым, елорда жұртшылығы жаңа Конституция жобасын оң қабылдады, – деп атап өтті мәжілісмен.
М.Магеррамов жаңа құжат азаматтар мен мемлекет арасындағы жаңа конституциялық құндылыққа негізделгенін атап өтті.
– Адам және адам капиталы мемлекеттің басты басымдығына, ал оларды қорғау мен дамыту Ата заңның өзегіне айналады, – деп түйіндеді мәжілісмен.
@halyk_partiyasy
