Қазақстан Халық партиясының төрағасы Ермұхамет Ертісбаев аймақтық партия филиалдарының жетекшілерімен жалпыреспубликалық кеңес өткізді. Кеңес 2026 жылғы 15 наурызда өтетін жаңа Конституция жобасы бойынша жалпыұлттық референдумға дайындықты аяқтауға және бір палаталы парламент – Құрылтайға ықтимал сайлау науқанының басталуына арналды.
Пікірлестер алдында сөз сөйлеген ҚХП басшысы Конституциялық реформа бойынша референдумға шамамен 10 күндей ғана уақыт қалғанын атап өтті. Қазақстан Халық партиясы ҚР Президенті Қасым-Жомарт Тоқаев бастамашы болған бұл реформаларды жүзеге асыруға тікелей қатысуда.
– Халық билігін қалпына келтіру үшін қуатты бірлестікке бірігуден басқа қару жоқ, – деді Ермұхамет Ертісбаев.
Соңғы бірнеше күнде ҚХП алдағы референдумға байланысты ауқымды ақпараттық-түсіндіру жұмысын жүргізіп, жүздеген кездесулер, форумдар, дөңгелек үстелдер және басқа да ағартушылық іс-шаралар ұйымдастырды. Бұл іс-шаралар партияның медиа ресурстарында кеңінен жарияланып, миллиондаған қаралым жинады. Сайлау науқаны өз мәресіне таяған кезде ҚХП төрағасы барлық партия мүшелерін реформаны қолдап дауыс беруге шақырды.
– Кез келген референдумның мәні – «иә!» немесе «жоқ!» деп айту, – деп атап өтті Ермұхамет Ертісбаев. – Біз – салмақты саяси партиямыз! Бүгін жалған емес, шынайы халық бірлігі қажет болып отырған сәтте, біз жаңа Конституция жобасын және Президентіміздің ішкі әрі сыртқы саясаттағы ұстанымын барынша қолдауымыз керек.
Алматы және Түркістан облыстық филиалдарының жетекшілері Бейбіт Құсайынов пен Зухра Қамбарова атқарылған жұмыс бойынша есеп берді. З. Қамбарова партия өкілдіктерінің аймақтың әр ауданында ашылуын қамтамасыз ету міндетінің сәтті орындалғанын баяндады. Б. Құсайынов өз филиалының «Әділетті және Прогрессивті Қазақстанның Халықтық Конституциясы үшін!» жалпыұлттық коалициясының қалалық штабы жұмысына белсенді қатысқанын айтты. Түсіндіру жұмыстарын жүргізу үшін филиал тарапынан 50 адам – белсенділер, мәслихат депутаттары, Қоғамдық кеңес өкілдері және басқалар жұмылдырылды. Алматы қаласындағы кәсіпорындардың еңбек ұжымдарымен 70-тен астам кездесу өткізілді.
– Бұл формалды шаралар емес, адамдармен жанды диалог, олардың үміт-тілектерін талқылау және ұсынылып отырған өзгерістердің маңызын түсіндіру болды, – деді Бейбіт Құсайынов. – Жұмыс жүйелі түрде жүргізілуде және түрлі әлеуметтік топтарды қамтиды.
ҚХП сарапшыларының болжамына сәйкес, жаңа Конституцияның жобасы қабылданады. Бұл реформалардың жүзеге асуына жол ашады, демек партияға Құрылтайға ықтимал сайлауға моральдық әрі физикалық тұрғыдан алдын ала дайындалу қажет. ҚХП төрағасы аймақтық филиалдарға облыстық штабтардың құрылымын қалыптастыру, партиялық тізімге кадрлық резервті іріктеу, үгітшілер мен байқаушыларды даярлау секілді бірқатар тапсырмалар берді.
– Бізге партияның барлық ресурстарын жұмылдыру қажет болады, – деді Е. Ертісбаев. – Біздің күшіміз – бірлікте! Қорытынды нәтиже әр партия өкілінің ұйымшылдығына, қатаң тәртібіне және жеке жауапкершілігіне байланысты! Біз ҚХП-ның нақты істер партиясы екенін дәлелдей аламыз!
@halyk_partiyasy
