Жастар елімізде жүргізіліп жатқан реформалардың тарихи маңызын терең түсінеді! Мұндай пікірді Қазақстан Халық партиясының Мәжіліс депутаты, партияның «JAS ORTA» жастар қанатының жетекшісі Ислам Сұңқар білдірді.
Болашақ Конституцияның соңғы жобасы 2026 жылғы 12 ақпанда жарияланды. ҚХП басқа саяси күштермен және қоғамдық ұйымдармен бірге бірыңғай Жалпыұлттық коалицияның құрамына кірді. «Әділетті әрі Прогрессивті Қазақстанның Халықтық Конституциясы үшін!» ұранымен Коалиция қатысушылары республика көлемінде елдің Негізгі заңы бойынша ауқымды ақпараттық-түсіндіру жұмыстарын жүргізуді жоспарлап отыр.
– Реформалар мемлекеттің тұрақты дамуы мен азаматтардың өмір сүру деңгейін арттырудың берік негізіне айналуы тиіс, – деп атап өтті Ислам Сұңқар.
Мәжіліс депутаты ҚХП-ның жүйелі түрде көтерген көптеген мәселелері жаңа Конституция жобасында объективті шешім тапқанын атап өтті. Бұл - бір палаталы Парламентке көшу, еңбек ету құқығы, азаматтардың құқықтарын қорғау (соның ішінде цифрлық ортада), коммерциялық емес ұйымдарды шетелдік қаржыландыру туралы ақпараттың ашықтығы және басқа да маңызды мәселелер.
– Біз жаңа Конституция жобасын қолдаймыз және Жалпыұлттық коалиция аясында оның нормаларын халыққа кеңінен түсіндіру бойынша барынша белсенді жұмыс жүргіземіз, – деп уәде берді Ислам Сұңқар.
@halyk_partiyasy
