ҚР Президенті Қасым-Жомарт Тоқаев ҚР Білім министрі Жұлдыз Сүлейменованы қабылдады. Мемлекет басшысына өткен жылдың қорытындылары мен 2026 жылға арналған міндеттер ұсынылды.
Білім министрі жаңа Конституцияның құндылықтарын ілгерілету мақсатында оқу бағдарламалары мен оқулықтардың мазмұнын жаңарту бойынша белсенді жұмыс жүргізіліп жатқанын хабарлады. «Таза Қазақстан» бастамасы аясында экологиялық білім беру стандарты әзірленуде. Сондай-ақ мектептерде «Адал азамат» бірыңғай тәрбие бағдарламасы енгізілуде. Оқу бағдарламалары оқу, жазу және арифметика дағдыларының пысықталуымен қайта қаралады.
Ж.Сүлейменованың айтуынша, «Келешек мектебі» ұлттық жобасы аясында 460 мың оқушыға арналған 217 мектептің құрылысы аяқталып, инфрақұрылымды дамыту мақсатында 184 білім беру нысаны пайдалануға берілді. Сондай-ақ үш ауысымды 80 және 31 апатты мектептің мәселесі шешілді. 209 мектепке күрделі жөндеу жүргізілді, 1192 пәндік кабинет заманауи жабдықпен жарақтандырылды, ал балабақша кезегі 2 есе қысқартылды. Білім беру жүйесін цифрландыру шеңберінде кешенді шаралар барлық жерде іске асырылуда (бүгінгі таңда мектептердің 99%-ы интернетке қосылған). «Әлеуметтік әмиян» жобасына 6 760 мектеп қатысады. Дипломдар, аттестаттар мен анықтамалар цифрлық форматта қолжетімді. «Ұстаз» платформасы педагогтерді аттестаттауды толық автоматтандыруды қамтамасыз етеді.
Қазақстан Халық партиясының депутаты Ирина Смирнова кездесуде бірқатар жағымды жайтты аңғарды.
– Біраз үзілістен кейін мектеп бағдарламасына «Қазақстан географиясы» пәні қайтарылады, – деді мәжілісмен. – Бастауыш мектепте оқытылатын пәндердің мазмұны қайта қаралды. Сауаттылық, жазу, арифметика және олардың функционалды қолданылуын еске түсірдік.
И.Смирнова қазір мектепте құқық пен міндет туралы көбірек айтылатынын атап өтті. Бұрын 9 сыныпта аптасына 1 сағат қана болатын. Сонда ғана Конституция туралы сөз болатын.
– Арнайы орта білім беру сапасына да ерекше көңіл бөлінді, – деп нақтылады ҚХП депутаты. – Бұл салада шұғыл түрде шешілуі тиіс көптеген мәселе бар!
@halyk_partiyasy
