Қазақстан Халық партиясынан сайланған Мәжіліс депутаттарының сайлаушылармен кездесу үшін өңірлерге жасаған жұмыс сапары мәресіне таяп қалды. Қорытынды кезеңде ҚХП фракциясының жетекшісі Магеррам Магеррамов Ұлттық шұғыл медицинаны үйлестіру орталығына және «Астана-1» теміржол вокзалына барды.
Мәжілісмен Ұлттық шұғыл медицинаны үйлестіру орталығында мекеменің қызметін талқылады. Мейманға таныстыру экскурсиясы ұйымдастырылып, халыққа жедел медициналық көмек көрсету жүйесі және медициналық қызметтің өзара іс-қимылы жайлы айтылды.
— Орталық заманауи жабдықтармен және озық технологиялармен жарақтандырылған, бұл шұғыл медициналық көмекті сапалы әрі жедел көрсетуге мүмкіндік береді, — деп атап өтті сапар қорытындысында Магеррам Магеррамов.
Осыдан соң депутат «Астана-1» вокзалына қызмет көрсететін «Қазақстан темір жолы» компаниясының басшылығымен кездесті.
Қазіргі таңда вокзал ғимаратында ауқымды күрделі жөндеу жұмыстары жүргізілуде: инженерлік желілер мен ішкі инфрақұрылым жаңартылып, жолаушылардың жайлылығы мен қауіпсіздігін арттыруға бағытталған заманауи жабдықтар орнатылуда.
— Біз қазақстандық қамтудың, яғни жөндеу жұмыстарын жүргізу кезінде қолданылатын отандық тауар өндірушілердің тауарлары мен материалдарының үлесін де талқыладық, — деп нақтылады М. Магеррамов.
@halyk_partiyasy
