Парламент «Алатау қаласының арнайы құқықтық режимі туралы» Конституциялық заңды екінші оқылымда қабылдады. Осылайша қала тәуелсіз басқару, қаржыландыру және жер пайдалану жүйесі бар ерекше мәртебеге ие болады. Басқару моделі ағымдағы әкімшілік басқару мен стратегиялық дамуды бөлуді қарастырады.
Сонымен қатар, заң «Digital by default» («Әдепкі бойынша цифрлық») қағидатын енгізуді және Алатауды жасанды интеллект технологияларын кеңінен қолданатын толыққанды Smart City ретінде дамытуды бекітеді. Нормалардың жеке блогы қаланың дербес қаржы-салық моделін қалыптастыруға бағытталған.
Инвестициялық саясатты іске асырудың негізгі құралы Алатаудың жер қоры болады. Жер учаскелері резиденттерге лицензиялар немесе шарттар негізінде, нақты инвестициялық жобаларға байланысты түрде беріледі. Бұл жерді даму ресурсы ретінде экономикалық айналымға тартуға мүмкіндік береді. Қаланың дамуы ұзақ мерзімді жоспарлау құжаттарына негізделіп жүзеге асырылады, оның ішінде стратегия, 30 жылға арналған тұжырымдамалық жоспар және оларды шектеулі түрде қайта қарау мерзімі бар 15 жылдық қала құрылысы жоспары қамтылады.
Қазақстан Халық партиясының парламенттік фракциясының жетекшісі, депутат Магеррам Магеррамов мұндай қалаларды құру ел үшін қажет деп санайды.
– Бұл оң нәтиже беретін әлемдік тәжірибе. Қарапайым провинциялық ауылдардың мегаполис деңгейіне дейін дамыған жағдайлар болған, – деді мәжілісмен. – Заң барлық қажетті жағдайларды жасайды, енді оларды іске асыру маңызды. Ал жүзеге асыру Үкіметке байланысты болады.
М. Магеррамовтың пікірінше, арнайы Конституциялық заң қаланы мемлекеттік бақылау мен реттеуге ықпал етеді. Әлеуметтік желілердегі скептиктердің күмәніне қарамастан, ерекше мәртебе прокурорлық қадағалауды, сот жүйесінің жұмысын, қолданыстағы заңнамалық нормалардың сақталуын жоққа шығармайды.
– Мұнда тек қала қосымша инвестициялар тарту арқылы экономикалық тұрғыдан дамуы үшін жағдайлар жасалып отыр, – деп түсіндірді ҚХП фракциясының басшысы.
@halyk_partiyasy
