Жолаушылар тасымалының сапасы сын көтермейді

Қазақстан Халық партиясы Қазақстан экономикасының локомотиві – «Қазақстан темір жолы» ҰК» АҚ тиімсіз жұмысы қандай тығырыққа тірейді деген сұраққа жауап алуға тырысты.

Мәжілістің пленарлық отырысында сөз сөйлеген ҚХП депутаты Айбек Паяев «ҚТЖ ҰК» өзінің инвестициялық жобаларын іске асыруға үнемі мемлекеттік бюджеттен қаражат тартуға тырысып жүргенін атап өтті. – Жолаушылар тасымалының сапасы өте төмен, – деді мәжілісмен. – Вагон паркі ескірген, ал жеке өндіріс пен қызмет көрсету жолға қойылмаған.

Бірнеше жыл бұрын көлік прокуратурасы «Тұлпар-Тальго» вагон жасау кәсіпорны шығарған вагондардың қазақстандық шығу тегі туралы сертификаттарды бұрмалау фактілерін анықтады. Тексеру көрсеткендей, «Қазақстандық құрам» мүлде жоқ екен. Дайын вагондар Еуропадан тасымалданып, отандық вагон жасау кәсіпорнының өнімі ретінде ұсынылған.

Қазір компания басшылығы «ҚТЖ» ҰК» АҚ үшін әрқайсының құны 1 млн еуродан асатын 700 вагон сатып алу үшін швейцариялық «Штадлер» компаниясымен келісімшарт рәсімдеуді жоспарлап отыр. – Бұл ретте бізде осы вагондарды жөндейтін және оларға қызмет көрсететін қуат жоқ, – деп нақтылады мәжілісмен. – Демек мұның барлығы Швейцарияда шығарылады. Бұл бюджеттен едәуір шығынды талап етеді.

ҚХП ұлттық компаниядағы вагон паркінің жыларман жағдайының себебін іздеуді ұсынды. Теміржол көлігі мен тасымалдау саласында осындай жағдайға тап болғанымызды түсініп, шығындарды жоюдың орнына не себепті біз қымбат келісімшарттарды рәсімдеуге ұмтыламыз? – Жүк тасымалы саласында вагондардың бағалау құнын төмендету және оларды нарықтық бағадан төмен бағамен сату фактілері анықталды, – деді А. Паяев.

Бір кездері прокуратура ҚТЖ-да көптеген бұзушылықтарды анықтады: жолдар мен жылжымалы құрамның тозу фактілерін жасыру, магистральдық желілерді жөндеу кезінде ұрлау, кірме жолдар мен теміржол тұйықтарын заңсыз жекешелендіру және т.б. Жолаушыларға көрсетілетін қызмет сапасы да көңіл көншітпейді.

Осының барлығына қарамастан, Қазақстан орасан зор транзиттік әлеуетке ие, бірақ ҚТЖ-дағы мәселелер оның даму үдерісін тежейді. – «Қазақстан темір жолы» ҰК» АҚ шығындарын азайту бойынша жүргізіліп жатқан жұмыстар туралы ақпарат беруді сұраймыз, – деп қорытты депутаттық сауалды Айбек Паяев.


Біздің ресми аккаунтымызға жазылыңыз:
@halykpartykz

Поделиться: