Мәжілістің Қаржы және бюджет комитетінің отырысы барысында Аграрлық несие корпорациясының қызметі талқыланды. Жиында Қазақстан Халық партиясының депутаты Ирина Смирнова еліміздің агроөнеркәсіптік кешенін несиелеуде байқалып отырған біртүрлі процеске назар аударды – қаржылай көмек көбіне аяққа нық тұрған, өзін дәлелдеген ауыл шаруашылығы тауар өндірушілеріне ғана көрсетіледі.
Мәжіліс депутатының айтуынша, фермерлік шаруашылықты енді бастап жатқан жаңа кәсіпкерлерге арнап берілетін арнайы несиені алу – іс жүзінде мүмкін емес.
– Қазіргі жүйе бойынша несиені тек тұрақты жұмыс істеп тұрған ірі шаруашылықтар ғана алады. Ал олар онсыз да ондаған жыл бойы жеңілдетілген несие мен субсидияны алып келеді! – деді депутат.
Осылайша, «баршаға қолжетімді» деп жарияланып жүрген аграрлық несиелендіру шын мәнінде тек санаулы кәсіпорындарға ғана қолжетімді болып отыр. Қалғандарының даму мүмкіндігі жоқ. Депутат мұндай тәсілді дұрыс емес деп есептейді.
– Ауыл – бұл елдің негізі, онсыз тұрақтылық болмайды! Бірақ адамдар жұмыс істеуге жағдай жоқ болғандықтан, қалаға көшіп жатыр. Сонда ауылда кім қалады? Ауылда кім еңбек етеді? Ауылды қалай дамытамыз? – деді Смирнова.
@halyk_partiyasy
