Қазақстан Халық партиясының депутаты, ҚР Президенті жанындағы халықтың әлеуметтік осал санаттарының құқықтары жөніндегі уәкіл Кенжеғұл Сейтжан мүгедектігі бар адамдарды әлеуметтік қорғау саласындағы үйлестіру кеңесінің отырысына қатысты.
Отырыс әлеуметтік қызметтер порталының жұмысына қатысты өзекті мәселелерге арналды: оның жұмыс істеуі, тиімділігі және пайдаланушылар тап болатын басқа да практикалық аспектілер. Мәжіліс депутаты әрі омбудсмен көру қабілеті бұзылған адамдар үшін порталдың қолжетімділігі мәселесін көтерді.
Бұған дейін Еңбек және халықты әлеуметтік қорғау министрлігі ерекше қажеттілігі бар пайдаланушыларды арнайы тестілеуші ретінде жүйеге қосу туралы хабарлаған болатын. Олардың міндеті – порталдың әртүрлі мүгедектігі бар адамдар үшін қолжетімділігін тексеру еді. Өкінішке қарай, бұл бастама сол күйі жүзеге аспай қалды.
– Маған мұндай жұмыс жүргізіледі деп хабарланды, бірақ іс жүзінде ештеңе жасалған жоқ, – деді Кенжеғұл Сейтжан.
Өз кезегінде К. Сейтжан цифрлық технологияларды меңгерген қоғамдық белсенділер арасынан мүгедектігі бар адамдарды ұсынып, уәде етілген тестілеуді жүргізуді ұсынды.
– Егер бұл ұсыныс қолдау таппаса, біз мәселені көтеруді жалғастырамыз, – деп атап өтті мәжілісмен әрі омбудсмен. – Бұл бағыттағы жұмыс қолжетімділікке, тең мүмкіндіктерге және инклюзивті саясаттың нақты іске асырылуына басымдық бере отырып жалғасады.
@halyk_partiyasy
