Қазақстан Халық партиясынан сайланған Мәжіліс депутаты, ҚР Президенті жанындағы Халықтың әлеуметтік тұрғыдан осал топтарының құқықтары жөніндегі уәкіл Кенжеғұл Сейтжан БҰҰ-ның Орталық Азия бойынша босқындар істері жөніндегі жоғарғы комиссары (БҰҰ БЖКБ) басқармасының өкілдерімен кездесті. БҰҰ БЖКБ соғыстан, қудалаудан, қақтығыстан және өзге де адам құқықтарының аяққа тапталуынан қашуға мәжбүр адамдарды қорғау саласында жұмыс істейді.
Басқарма өкілі Ханс Фридрих Шоддер оның ведомствосының Қазақстанмен ынтымақтастығы туралы айтып берді. БҰҰ осы бөлімшесінің бірінші кеңсесі біздің елімізде 1999 жылы пайда болды. Сол кезде республика босқындардың мәртебесі туралы конвенцияны ратификациялады. Қазір Қазақстанда жоғарыда аталған мәртебеге ие 322 адам тұрады. Олар Ауғанстаннан, Украинадан, Өзбекстаннан, Сириядан және ҚХР-дан келген.
– Бұл адамдардың құқықтарын қорғау қажет, - деді Ханс Фридрих Шоддер.
Кенжеғұл Сейітжан «босқын» термині қазақстандық заңнамада 2009 жылдан бастап пайда болғанын нақтылады. Тараптар ынтымақтастық жасау және бірлескен жұмыс жүргізу үшін босқындардың, азаматтығы жоқ адамдардың және халықаралық босқын мәртебесі бар, бірақ Қазақстанда тұратын адамдардың құқықтарын қорғау салалары бойынша алдын ала бағыттарды белгіледі.
– Бұл адамдарда бірде-бір елдің азаматтығы жоқ, көп жағдайда өздерінің де, отбасы мүшелерінің де құжаттары жоқ, - деп түсіндірді БҰҰ БЖКБ өкілі. - Ата-анасының құжаттары болмаған соң, балалардың да құжаттары жоқ.
Депутат К.Сейітжан ынтымақтастықтың жемісті болатынына сенім білдірді.
– Босқындардың құқықтарын қорғау - бұл омбудсмен ретінде менің де жұмысымның бір бөлігі, - деп атап өтті Мәжіліс депутаты. - Олар сондай-ақ халықтың әлеуметтік осал топтарының өкілдері болып табылады.
@halyk_partiyasy
