Қазақстан Халық партиясынан сайланған Мәжіліс депутаты Ислам Сұңқар Павлодар облысын аралап жүр. Мәжілістің Аграрлық мәселелер комитетінің мүшесі ауыл тұрғындарымен бірқатар кездесу өткізді.
Жас депутат Павлодар ауданының әкімі Иван Дычкомен 2023-2027 жылдарға арналған ауылдық аумақтарды дамыту тұжырымдамасын, сондай - ақ «Ауыл – ел бесігі» жобасын іске асыру жолдарын талқылады.
– Аграрлық комитет ҚР Ауыл шаруашылығы министрлігімен бірлесіп, осы мәселелерді бірнеше рет талқылады, – деп атап өтті И.Сұңқар. – Осыған қатысты жұмыс орындарын құру, әлеуметтік және демалыс нысандарын салу, сондай-ақ ауылда тұрғын үйлердің іргетесын қалау бойынша нақты ұсыныс берілді. Бізге бағдарламалардың жүзеге сапалы асырылғаны маңызды.
Сапар аясында мәжілісмен Павлодар облысының Жоғары инновациялық аграрлық колледжіне барып, материалдық-техникалық базасымен танысты. Осы жерде аграрлық-өнеркәсіптік сектор мамандарын даярлау мәселесін тілге тиек етті.
– Алдағы сессияда комитет «Агроғылым – ауыл шаруашылығына» деген тақырыпта дөңгелек үстел өткізуді жоспарлап отыр, – деп нақтылады мәжілісмен. – Бүгінгі кездесудің осы іс-шараға дайындық үшін маңызы зор.
Бұдан кейін И. Сұңқар аймақтың белсенді жастарымен бірнеше кездесу өткізді. Ол жастарға өзінің Парламенттегі қызметі мен Халық партиясының саяси ұстанымы туралы айтып берді.
– Біздің партия өзінің сайлауалды бағдарламасында жастарға қолайлы жағдай жасауға ерекше назар аударды, – деп атап өтті депутат.
@halyk_partiyasy
