Қазақстан Халық партиясы «Спорт - өмір серігі» атты жаңа акция бастады. Акция аясында партиялықтар спорттық жарыстар, өңірлік турнирлер өткізіп, салауатты өмір салтын насихаттауды көздеп отыр.
Осы мақсатта, ҚХП Қызылорда облыстық филиалы № 39 «Қызылөзек» орта мектебінде жасөспірімдер арасында шағын футбол турнирін ұйымдастырды. Іс-шараға Қызылөзек ауылдық округінің Қаракөл, Айнакөл және Қызылөзек ауылдарынан 7 команда қатысты.
– Спорттық іс-шараның негізгі мақсаты - жасөспірімдердің спортқа деген қызығушылығын арттыру, салауатты өмір салтының маңыздылығын түсіндіру және жазғы демалысты тиімді бастау, - деп атап өтті жарысты ұйымдастырушылар.
Сайыста бірінші орынды Қаракөл ауылының жасөспірімдері, 2- орынды Айнакөл ауылының командалары, 3- орынды Қызылөзек ауылының футболшылары иеленді. Үздік ойыншылар «Үздік қорғаушы», «Үздік шабуылшы» және «Үздік қақпашы» номинациялары бойынша арнайы сыйлықтарға ие болды.
ҚХП Ақмола облыстық филиалы Ақмола облысының Ушу Федерациясымен бірлесіп, акция аясында ушу-саньда бойынша ашық чемпионат өткізді. Жарысқа Астана, Қосшы, Щучинск, Атбасар, Есіл, Петропавл және Көкшетау қалаларынан 220 дарынды спортшы қатысты. Бірінші күні ақтық сайысқа шығатын ең мықты спортшылар анықталды. Чемпионаттың жүлдегерлері дипломдармен және медальдармен марапатталды, ал үздіктер ақшалай сыйлықтарға ие болды.
– Аталған чемпионаттың мақсаты - балалар арасында спортпен айналысуды дәріптеу, - деп атап өтті ҚХП филиалы басшысының міндетін атқарушы Арман Тастамбеков. - Балалар - еліміздің болашағы!
ҚХП Атырау облыстық өкілдігінің белсенділері Әл-Фараби атындағы «BINOM» мектеп-лицейінің базасында өткен білім беру мекемелерінің педагогтары арасында шағын футболдан «Ustaz Cup» облыстық турнирін ұйымдастыруға белсене қатысты.
Абай облысындағы партия мүшелері спорттық мерекені Балаларды қорғау күнімен біріктіріп, 4-12 жас аралығындағы балаларға арналған жүгіру жарыстарын ұйымдастырды. «Жас орта» партиясы мен «Omir-qozgalys» SEMEY «run club kids» жастар қанаты, сондай-ақ, Семей қаласының әкімдігі және мәслихат депутаты Мейірлі Кеңесбектің өзі ҚХП филиалына белсенді көмек көрсетті. Жарыс жеңімпаздары құрмет грамоталарымен және сыйлықтармен марапатталды.
@halyk_partiyasy
