Республика күні қарсаңында Қазақстан Халық партиясы еліміздің өңірлерінде еңбек адамдарына алғыс білдіріп, мерекемен құттықтап жатыр. «Мәдени мұра: Еңбек ері – Республика мақтанышы!» атты партиялық бастама аясында партия өкілдері ел экономикасының дамуына айрықша үлес қосып жүрген еңбек ұжымдарына алғыс хат табыстауда.
Қызылорда облыстық филиалының өкілдері «Қызылорда-Нан» және «Ассоль» ЖШС қызметкерлерімен кездесті.
«Қызылорда-Нан» – Кәсіпкерлік және өнеркәсіп басқармасының қолдауымен іске асырылған өндірістік жоба. Кәсіпорын толықтай автоматтандырылған және заманауи технологиялармен жабдықталған. Мұнда жыл сайын 2 520 тонна нан-тоқаш өнімдері, 1 008 тоннадан астам кондитерлік өнімдер, 2 500 тоннадан аса печенье және 1 152 тонна макарон өнімдері өндіріледі. Барлығы 235-тен астам отандық өнім түрі бар.
«Ассоль» ЖШС – йодталған ас тұзын өндіру бойынша еліміздегі жетекші кәсіпорындардың бірі. Өндіріс екі зауытта жүзеге асырылады. Оның алғашқысы 2016 жылы іске қосылып, сағатына 3 тонна өнім шығарады. 2022 жылы екінші зауыт пайдалануға беріліп, қуаттылығы сағатына 10 тоннаға жетті. Кәсіпорынның өнімдері Беларусь, Грузия, Қырғызстан, Моңғолия және Балтық елдеріне экспортталады.
Ал Қостанай облыстық филиалы партия өкілдері «Қостанай Су» ЖШС еңбек ұжымымен жүздесті. Олар өңір тұрғындарының күнделікті өміріне аса қажетті қызметті қамтамасыз етіп отырған мамандарға ризашылық білдірді.
– Қиын ауа райы жағдайында да, әлеуметтік-экономикалық кез келген ахуалда да «Қостанай Су» қызметкерлері тұрғындарды үздіксіз ауызсумен қамтамасыз етіп, қаланың су жүйесінің тұрақты жұмысын қамтамасыз етіп келеді. Олардың өңірдің тұрақты дамуына қосқан үлесін жоғары бағалау қажет, - деді партия өкілдері.
Кәсіпорын басшысына ұжымның тұрғындар өмір сапасын жақсартуға және коммуналдық тұрақтылықты қамтамасыз етуге қосқан еңбегі үшін алғыс хат табысталды.
@halyk_partiyasy
