Қазақстан Халық партиясы аудандар мен облыстық маңызы бар қала әкімдерін сайлау бойынша сайлау науқаны аясындағы үгіт-насихат жұмыстарын жалғастыруда. Жақында Солтүстік Қазақстан облысы Мамлют ауданында сайлаушылармен кездесу өтті. Мұнда аудан әкімі сайлауына Қазақстан Халық партиясынан кандидат ретінде Елена Степаненко тіркелген. Жоспарланған барлық іс-шараға партия төрағасы Ермұхамет Ертісбаев қатысты.
Алғашқы кездесу Мамлют ұн тарту комбинатының еңбек ұжымымен өтті. Сайлаушылар алдында сөйлеген сөзінде ҚХП басшысы алдағы сайлаудың бүкіл ел үшін маңыздылығын атап өтті.
Қазақстан Тәуелсіздік алғалы бергі 32 жылдан соң алғаш рет азаматтарымызға өз аудандарының әкімдерін сайлауға мүмкіндік берілді, - деп атап өтті Ертісбаев. - Яғни, сіз өз билігіңізді өзіңіз таңдайтын боласыз! Бұл біздің республикамызды саяси жаңғыртудағы қуатты қадам.
Мамлют ауданында 13 мың сайлаушы тұрады. ҚХП төрағасы сайлаушылардың барлығын 5 қарашада сайлау учаскелеріне барып, халық кандидатына дауыс беруге шақырды. Елена Степаненко өз өмірбаянын қысқаша айтып, сайлауалды тұғырнамасын баяндады.
Мен ауылда дүниеге келдім, ауылда жұмыс істедім, ауылдың барлық мұң-мұқтажын жақсы білемін, - деді кандидат. - Әкім сайлауына қатысамын деп жауапты шешім қабылдағалы бері, ауданымыздың барлық елді мекендерін аралап шықтым. Маған ауданымыздағы барлық мәселелер бесенеден белгілі, оның ресурстық әлеуеті мен экономикалық мүмкіндіктері де жақсы таныс.
Степаненко өзінің сайлауалды бағдарламасының басты бағыттары деп ШОБ-ті, ауыл шаруашылығын және аграрлық өнімдерді қайта өңдеушілерді қолдауды атады. - Осы салаларға нақты қолдау болғанда ғана маусымдық жұмыспен қамтудың деңгейі көтеріліп, тиісінше халықтың әл-ауқаты артады,-деді.
Үміткер егер сайланған жағдайда алдағы төрт жылда жол инфрақұрылымының барлық мәселелерін шешуге уәде берді. Ауылдық мектептердің ғимараттары мен денсаулық сақтау нысандарын, сондай-ақ жергілікті мәдениет үйлерін жөндеу мен қайта жаңғыртуға ерекше назар аударатынын айтты.
Сайлаушылармен дәл осындай кездесу Мамлют мәдени орталығының залында да өтті.
Аудандар мен облыстық маңызы бар қалалар әкімдерінің сайлауы 2023 жылдың 5 қарашасында өтеді. ҚХП сайлау науқаны кезеңінде 20000-нан астам сайлаушыны қамтыған 300-ге жуық іс-шара ұйымдастырды.
@halyk_partiyasy
.jpeg)
