Қазақстан Президенті Қасым-Жомарт Тоқаев «Заңсыз сатып алынған активтерді мемлекетке қайтару туралы» заңға және ілеспе заңнамаға енгізілген түзетулерге қол қойды. Құжаттың қабылдануына «Қазақстан Халық партиясы» парламенттік фракциясы белсенді атсалысты.
ҚХП фракциясының жетекшісі, заңнама және сот-құқықтық реформа комитетінің хатшысы, депутат Магеррам Магеррамов мемлекеттік мүлікті қайтаруға және ілеспе нормаларға түзету енгізуге бағытталған заң жобасын талқылау бойынша жұмыс тобына екі рет басшылық жасады. 11 кодекс пен 13 заң өзгертілді. Мәжілістің пленарлық отырысында заң жобасын М. Магеррамов ұсынды.
– Осылайша, мемлекеттік органдар мен ұйымдардың активтерді қайтару, сондай-ақ оларды заңсыз алуға ықпал еткен себептер мен жағдайларды жою саласындағы жұмысының нақты және ашық тетігі құрылады, – деп атап өтті сол кезде парламентарий.
Құжат олигархтарды заңсыз байытуды тоқтатуды, әлеуметтік әділеттілікті қалпына келтіруді және халықтың әл-ауқатын арттыруды көздейді.
Қазақстан Халық партиясы заңсыз жекешелендірілген дүниені қайтаруды және капиталды оффшорға шығарудың жолын кесуді қолдайды.
– Активтерді қайтарудың негізгі тетігі азаматтық тәркілеу институты болып табылады, – деп түсіндірді кейін ҚХП фракциясының басшысы. – Ол қолданыстағы Қылмыстық және әкімшілік тәркілеуге қосымша енгізіледі.
Бұл институт активтерді азаматтық тәртіппен ерікті немесе мәжбүрлеп қайтаруды мақсат тұтады. Мұндай тәркілеу туралы шешімді істің мән-жайына байланысты қазақстандық немесе шетелдік сот шығарады. Заң жобасында депутаттар мен жоғары эшелон судьяларынан бастап кәсіпкерлер мен мемлекеттік қызметшілерге дейін заңға бағынатын жоғары лауазымды тұлғалардың нақты тізімі түзілген. Заңсыз алынған мүлік рәсімделген лауазымды тұлғалардың туыстары да назардан тыс қалмайды.
– Заң елімізді тонаумен айналысқан жемқорлар мен олигархтарға қарсы бағытталғанын атап өту маңызды деп санаймын, – деді М.Магеррамов. – Сондықтан шетелдік және қазақстандық адал инвесторларға ештеңеден қорқудың қажеті жоқ.
@halyk_partiyasy
