Қазақстан Халық партиясы фракциясының жетекшісі, Мәжіліс депутаты Магеррам Магеррамов болашақ сәбидің денсаулығына қауіп төндіретін генетикалық тәуекелдерді алдын ала анықтау жүйесін енгізуді ұсынды. Оның айтуынша, мұндай тәсіл емделмейтін сырқаттар мен туа біткен мүгедектіктің алдын алуға мүмкіндік береді.
Депутат жүкті болуды жоспарлап жүрген ерлі-зайыптыларды алдын ала генетикалық тексеруден өткізу – әлемдік тәжірибеде кең тараған практика екенін атап өтті.
– Бүгінде медицинада «carrier screening» деп аталатын генетикалық тест заманауи әрі нақты әдістердің бірі ретінде мойындалған. Бұл зерттеу болашақ ата-аналардың жүздеген тұқым қуалайтын ауруларға (мысалы, муковисцидоз, бұлшық еттің жойылмалы атрофиясы, нәзік Х-синдромы және тағы басқалары) бейімділігін анықтауға мүмкіндік береді. Сондай-ақ кариотиптеу арқылы хромосомалық ауытқулар да анықталады, – деді депутат.
Оның сөзінше, генетикалық кодты талдау нәтижесінде адам ағзасының жиі кездесетін ондаған ауруларға бейімділігі айқындалып, екі ата-ананың генетикалық сәйкестігі мен балада күрделі аурудың пайда болу қаупі анықталады.
– Бұл жол – ұлттың денсаулығын жақсартудың және елдегі сапалы адам капиталының санын арттырудың ең тиімді әдісі. Әр азаматтың генетикалық төлқұжатын жасау – болашақта дені сау ұрпақ дүниеге келетін жағдай қалыптастыру деген сөз, – деді Магеррамов.
Бюджет шығындарын оңтайландыру және ұлт денсаулығын сақтау мақсатында ҚХП фракциясы Үкіметке жүктілікті жоспарлап жүрген отбасыларға генетикалық және хромосомалық ақаулар қаупін анықтауға арналған ерікті әрі тегін алдын ала тексеруден өту мүмкіндігін енгізуді ұсынды
@halyk_partiyasy
