Қант диабетін тегін медициналық көмектің кепілдік берілген көлемі (ТМККК) тізімінен алып тастап, оны міндетті әлеуметтік медициналық сақтандыру (МӘМС) жүйесіне көшіру науқастар үшін қиындық тудыруы мүмкін. Бұл әсіресе инсулинге тәуелді, яғни 1-типті қант диабетімен (ҚД-1) ауыратын азаматтарға қатты әсер етеді.
Жуырда Денсаулық сақтау вице-министрі Ержан Нұрлыбаев Қазақстанда инсулинге тәуелді науқастардың барлығы мүгедектікке ие екенін және автоматты түрде мемлекет тарапынан МӘМС жарнасы төленетін санатқа кіретінін айтқан болатын. Алайда «Диабеттік ата-аналар комитеті» қоғамдық қорының директоры Руслан Зәкиев бұл мәлімет шындыққа жанаспайтынын алға тартады. Еңбек және халықты әлеуметтік қорғау министрлігінің деректеріне сәйкес, 1-типті қант диабетімен ауыратын ересек азаматтардың тек 48 пайызы ғана мүгедектік мәртебесіне ие.
Сонымен қатар, Денсаулық сақтау министрлігінің анықтамасына сүйенсек, электронды тіркеу-диспансерлік база (ЭТДБ) мәліметтері бойынша 2025 жылы Қазақстанда қант диабетімен ауыратын 535 033 науқас тіркелген. Оның ішінде 30 577 адам – 1-типті диабетпен ауырады, олардың 5 625-і – 18 жасқа дейінгі балалар. Ал Руслан Зәкиев ұсынған деректер өзгеше: 2025 жылдың 30 қыркүйегіндегі жағдай бойынша Қазақстанда 32 040 адам СД-1 диагнозымен тіркелген, олардың 29 553-і МӘМС жүйесінде бар.
– Балаларды есепке алмай-ақ қояйын, себебі олар МӘМС жүйесіне автоматты түрде кіреді. Сонда МӘМС жүйесінде 1-типті диабетпен ауыратын ересектердің 92 пайызы ғана қамтылған. Шенеуніктер бар болғаны 2,5 мың адамға «қателескен». Бірақ бұл – статистикалық қателік емес, тағдыры таразыға түскен тірі адамдар, - дейді қоғам белсендісі.
Осыдан-ақ үрейлі қорытынды шығаруға болады. Өмірі тікелей инсулинге тәуелді 2,5 мың адамның екі аптадан кейін өміріне қауіп төнуі мүмкін. Себебі диабетпен ауыратын адам инсулинсіз ең көбі екі-үш күн ғана өмір сүре алады. Қазақстан Халық партиясы бұған дейін де қант диабетімен ауыратын науқастарды дәрі-дәрмекпен қамтамасыз ету мәселесін бірнеше рет көтерген. ҚХП-ның парламенттік фракциясы бұл тақырыпта арнайы дөңгелек үстел өткізіп, онда науқастар да, дәрігерлер де, Денсаулық сақтау министрлігінің өкілдері де өз пікірін білдірген болатын.
– Қазақстан Республикасының Денсаулық сақтау министрлігі 1-типті қант диабетімен өмір сүріп жатқан адамдардың тағдыр тәлкегіне ұшырауына жол бермеуі тиіс, – деп пікір білдірді ҚХП депутаты Ирина Смирнова.
@halyk_partiyasy
