Қазақстан Халықтық партиясы белгілі жазушы, публицист және аудармашы Әбдіжәміл Нұрпейісовтің шығармаларына арналған үздік иллюстрациялар байқауын аяқтады. Байқау Қызылорда қаласындағы М.Қалауов атындағы өнер мектебінде өтті. Шара классик жазушының 100 жылдық мерейтойына орай ҚХП-ның «Теңдесі жоқ кемеңгер жазушы» акциясы аясында ұйымдастырылды.
Әбдіжәміл Нұрпейісов ХХ ғасырдағы отандық және әлемдік әдебиетке баға жетпес үлес қосқан қаламгерлердің бірі. Оның шығармалары әлемнің бірнеше тіліне аударылған. Нұрпейісовтің туған жеріне деген сүйіспеншілік пен гуманистік идеяларға негіздеделген шығармашылығы жас суретшілерге ерекше шабыт сыйлап, байқауға ұсынған жұмыстарына негіз болды.
Дарынды жастардың еңбегін Қазақстан суретшілер одағының мүшесі Темірбек Сағымбаев, С.Айтбаев атындағы көркемсурет галереясының өкілі Батырбек Назаров, сондай-ақ С.Айтбаев атындағы көркемсурет галереясының меңгерушісі Кенжегүл Ахметова сарапқа салды.
Сурет байқауына барлығы 19 студент қатысты. Байқау қорытындысы бойынша бір бірінші орын, екі екінші орын және үш үшінші орын бөлінді. Жеңімпаздарды марапаттау рәсімі алдағы күндері өтеді.
– Біздің іс-шараларымыздың негізгі мақсаты – оқырмандар арасында Әбдіжәміл Нұрпейісовтің шығармаларын дәріптеу, - деп атап өтті ҚХП Қызылорда облыстық филиалының өкілдері.
@halyk_partiyasy
